कालिकोट । कर्णालीका ५ वटा जिल्लामा यातायात सेवा अवरुद्ध भएको छ। पहिरो तथा खोला बढेका कारण यातायात सेवा अवरुद्ध भएको हो ।भेरी करिडोरभित्र पर्ने डोल्पाको त्रिपुरासुन्दरी–१ छलगाडमा खोला बढेका कारण यातायात सेवा ठप्प भएको छ। त्रिपुरासुन्दरी–९ चुँगाडमा ट्रक फसेपछि यातायात ठप्प भएको छ।भित्री सडकअन्तर्गतको रुकुम पश्चिमको मुसीकोट–३ माझमीमा पहिरो गएका कारण सडक अवरुद्ध भएको प्रहरीको भनाई रहेको छ।रुकुम पश्चिमकै बाँफिकोट गाउँपालिका–३ र ४ को बीचमा रहेको छिनखेत–पिपल जोड्ने सडक खोला बढेका कारण अवरुद्ध हुँदा समस्या भएको छ।कर्णाली करिडोरअन्तर्गत खार्पुनाथ–१ सुनखडादेखि लालुबगरसम्म सुक्खा पहिरोका कारण यातायात अवरुद्ध भएको प्रहरीको भनाई रहेको छ।कालिकोटको पचालझरना–८ लाभामा पहिरोका कारण सडक अवरुद्ध भएको छ भने मुगुको छायाँनाथ रारा नगरपालिका–७ जिरो प्वाइन्ट भित्री सडकमा पहिरो आएपछि सडक अवरुद्ध भएको छ।
