चट्याङ लागेर पर्वतको मोदी गाउँपालिकाका दुई जनाको मृत्यु

पर्वत । पर्वत जिल्लाको मोदी गाउँपालिकाका छुट्टाछुट्टै स्थानमा शनिबार साँझ परेको चट्याङबाट दुई जनाको मृत्यु भएको छ । मोदीगाउँपालिका वडा नं १ भुकताङ्लेमा एक महिला र वडा नं ७ राम्जादेउरालीमा एक पुरुषको मृत्यु भएको बताइएको छ । भुकताङ्लेका ५८ वर्षीया प्रेमकुमारी शाही र राम्जादेउरालीस्थित स्थानीय जीवनज्योति प्राविका बहालवाला शिक्षक ५७ वर्षीय शालिकराम तिमिल्सिनाको चट्याङ लागेर मृत्यु भएको जिल्ला प्रहरी कार्यालयका प्रहरी निरीक्षक अविनाशदिप केसीले जानकारी दिएका छन् । उनका अनुसार शनिबार साँझ ६.३० बजे आफ्नै घरको पिँढीमा चट्याङ लागेर अचेत बनेका तिमिल्सनालाई उपचारका लागि पोखरास्थित गण्डकी मेडिकल कलेजमा लगिएकामा चिकित्सकले मृत घोषणा गरेका थिए ।