कालिकोट – आज विहान धादिङको घाटबेँसीबाट त्रिशुली नदीमा बस खस्दा ज्यान गुमाउनेको सङ्ख्या ६ पुगेको छ । ज्यान गुमाउनेमा पाँच पुरुष र एक महिला छन् । ३८ जना यात्रुको उद्धार गरिएको बताइएको छ । सात जनालाई थप उपचारको लागि काठमाण्डौ लगिएको साथै अन्यको गजुरी प्राथमिक स्वास्थ्य केन्द्र र गजुरी अस्पतालमा उपचार भैरहेको धादिङ प्रहरीले जानकारी दिएको छ । कपिलवस्तुबाट राजधानी काठमाण्डौका लागि छुटेको लु२ख २१२१ नम्बरको बस बिहान करीव ४ः४० मिनेट जाँदा धादिङको गजुरी गाउँपालिका ५ घाटबेँसीमा दुर्घटना भएको थियो । बसमा सवै ५१ जना यात्रु र चालक रहेको एकीन गरीएको छ । जिल्ला प्रहरी कार्यालय धादिङका प्रहरी नायब उपरीक्षक तथा सूचना अधिकारी सन्तुलालप्रसाद जैसवारका अनुसार एक महिलासहित ६ जनाको शव फेला परेको छ । ज्यान गुमाउनेहरुको अहीले सम्म परिचय खुल्न नसकेको जनाइएको छ ।
