१०० भन्दा बढी कैदीबन्दी बिरामी, उपचारमा कठिनाई

कालिकोट । जिल्ला कारागार कार्यालय चितवनमा १११ कैदीबन्दी बिरामी परेका छन्। बजेट नहुँदा कैदीबन्दीको उपचारमा समस्या भएको कारागार प्रशासनले बताएको छ ।‘उपचारका लागि पर्याप्त बजेट निकासा नहुँदा औषधि खरिद गर्न समस्या हुने गरेको छ’, कारागार प्रमुख कमलप्रसाद आचार्य भन्छन्, ‘औषधि खरिद गर्न समस्या हुँदा दाताको सहयोग लिने गरिएको छ।’१११ मध्ये आधाभन्दा बढी कैदीबन्दी उच्च रक्तचापबाट पीडित छन्। अन्य जिल्लाबाट उपचारका लागि कैदीबन्दी चितवन पठाउने गरिएको कार्यालय प्रमुख आचार्यले जानकारी दिएका छन्।उनका अनुसार नवलपरासी, धादिङ, गोरखा, मकवानपुरलगायत जिल्लाबाट बिरामी कैदीबन्दी यहाँ उपचारका लागि ल्याउने गरिएको छ। अहिले कारागारमा मधुमेहका २६, थाइराइडका तीन, मुटुरोगी चार, एचआइभी सङ्क्रमित चार, छारेरोगबाट पीडित चार, मानसिक रोगी पाँच, हेपाटाइटिसबाट पीडित तीन तथा अन्य रोगबाट पीडित कैदीबन्दी छन्।
जिल्लामा केन्द्रीयस्तरको सरकारी अस्पताल, क्यान्सर अस्पताल, दुई ठूला मेडिकल कलेज र २४ भन्दा बढी निजी अस्पताल रहेका कारण कैदीबन्दीलाई उपचारका लागि यहाँ पठाउने गरिएको छ। अहिले कारागारमा क्षमताभन्दा झण्डै २०० बढी कैदीबन्दी राखिएको छ ।