गमगाढको नदीमा पुल नहुँदा आवागमनमा कठिनाइ

कालिकोट । मुगु गमगाढको नदीमा ठेकेदारले पुल निर्माण नगर्दा स्थानीय र विद्यार्थीहरुलाई विद्यालयमा आउजाउ गर्न समस्या भएको छ ।वर्षाको समयमा खोला बढ्ने र बाढीले बगाउने डरले आकाशमा कालो बादल लाग्नासाथ विद्यार्थी बिदा मागेर घर फर्किन्छन् । मुगुको छायाँनाथ रारा नगरपालिका १, १०, ११ र १२ त्यसैगरी मुगूम कार्मारोङ गाउँपालिकाका स्थानीय जिल्ला सदरमुकाम गमगढी बजारमा आउँदा जाँदा गमगाढ खोला तर्नका लागि खोलामाथि राखिएका काठका दुई लाप्का भएर खोला तर्दा काँप्दै खोला तर्ने गर्छन् । दिनमा यही लाप्काको भरमा काम्दै सयौँको सङ्ख्यामा गमगाढ खोलामाथि तर्ने गरेको स्थानीय सुरेन्द्रबहादुर मल्लले बताए ।जिल्ला सदरमुकाम जाँदा र फर्किँदा बाटोमा पर्ने गमगाढ खोलाको अल्कासाँघु भन्ने स्थानमा पक्की पुल नहुँदा सिङ्गो मुगुम कार्मारोङ गाउँपालिका र छायाँनाथ रारा नगरपालिका–१९ गाउँका बासिन्दाले सधैँ सास्ती भोग्दै आएका छन् ।मीन माविमा अध्ययनरत विद्यार्थी आकाशमा कालो बादल आउनासाथ बिदा मागेर घर जान हतार गर्ने गरेको शिक्षक शिवलक्ष्मी मल्लले बताए । उनका अनुसार वर्षाको समयमा बाढी आएर खोला तर्न कठिन हुने भएकाले पानी पर्नुभन्दा पहिल्यै खोला तरिसक्नका लागि पढाइ बीचमै छाडेर विद्यार्थी घर जान हतार गर्ने गरेका छन् । पुल नहुँदा त्यही खोला तरेर आउने विद्यार्थीको पढाइमा समेत असर गरेको शिक्षक मल्लले बताए ।सडक डिभिजन कार्यालय जुम्लाले नाग्म गमगढी लोगमार्गको नदी र खोला खण्डमा पर्ने दश वटा पक्की पुलको निर्माण गर्न विसं २०७८ फागुन ९ गते हिम सगरमाथा कन्स्ट्रक्सन प्रालिसँग रु ३२ करोड ६८ लाख ९२ हजारमा सम्झौता गरेको थियो ।निर्माण प्रालिले कालीकाखेतु, बाँजागाड, विष्टवाडा, रोकायावाडा, गोठीजिउला, पिना, झ्यारीखोला, गमगाढ, लुम्स त्यसैगरी काठेखोलासम्म नाग्म गमगढी लोगमार्गको नदी र खोला खण्डमा पर्ने दश वटा पक्की पुलको निर्माण ०८२ साल भदौ ८ गतेभित्र सम्पन्न गर्ने गर्ने गरी जिम्मा लिएको थियो ।